ക്വുര്ആനില് രാഷ്ട്ര പ്രതിരോധത്തിന്റെ ഭാഗമായി പറയുന്ന വാക്യങ്ങള് വായിച്ച് തെറ്റിദ്ധരിച്ച് പെട്ടെന്നാര്ക്കോ ഉണ്ടായൊരു വെളിപാടിന്റെ പ്രതിഫലനമാണ് ഐഎസ് എന്നു യാഥാര്ത്ഥ്യ ബോധമുള്ളവര്ക്ക് വാദിക്കാന് കഴിയില്ലെന്നുറപ്പാണ്. പിന്നെ ഐഎസിനെ സൃഷ്ടിച്ചതെന്താണെന്നു ചോദിച്ചാല് അതിനതിന്റെതായ രാഷ്ട്രീയവും ചരിത്രപരവും മനഃശാസ്ത്രപരവുമായ പരിസരങ്ങളുണ്ട്.
ഐഎസിന്റെയും അല് ക്വാഇദയുടെയും വേരുകള് ചികഞ്ഞാല് എത്തുക ഒരേ സ്ഥലത്താണ്. അഫ്ഗാന്റെ മണ്ണില് സോവിയറ്റ് യൂണിയന് നടത്തിയ അധിനിവേശ ശ്രമങ്ങള്ക്കെതിരെ അമേരിക്കന് മേല്നോട്ടത്തില് നടന്ന മുജാഹിദീന് പ്രതിരോധ സംഘങ്ങളില് നിന്നാണ് എല്ലാം തുടങ്ങുന്നത്.
അഫ്ഗാനെതിരെയുള്ള കടന്നുകയറ്റം മൊത്തം ഇസ്ലാമിനുമെതിരെയുള്ള കയ്യേറ്റമായി വ്യാഖ്യാനിച്ച് സൗദിയിലെയും മറ്റു രാഷ്ട്രങ്ങളിലെയും തീവ്രചിന്താഗതിക്കാരെ ഒരുമിച്ചുകൂട്ടി അത്തരമൊരു പ്രതിരോധസംഘം ഉണ്ടാക്കിയാല് മാത്രമല്ല CIA യ്ക്ക് കീഴില് Operation cydone എന്ന പേരുനല്കി അഫ്ഗാന് മുജാഹിദ് ഗ്രൂപ്പുകള്ക്ക് ആയുധവും പണവും നല്കി പിന്തുണ നല്കിയതും ഇന്നത്തെ അമേരിക്ക തന്നെയാണ്. ഈ അഫ്ഗാന് ഗ്രൂപ്പുകളുടെ മുന്നിരയില് ഉണ്ടായിരുന്നവരാണ് അല് ക്വാഇദയുടെ പിതാവായ ഉസാമ ബിന് ലാദനും, ഐഎസിന്റെ പിതാമഹനായ സര്ക്വാവിയുമെല്ലാം.
2011 മാര്ച്ചില് സിറിയയില് അഭ്യന്തര യുദ്ധം ആരംഭിച്ചതോടെ ബാഗ്ദാദി ഒരു സംഘത്തെ ഇറാക്വില്നിന്നും സിറിയയിലേക്ക് അയച്ചു. തുടര്ന്ന് സിറിയന് ബശ്ശാര് അല് അസദ് ഗവണ്മെന്റിനെതിരെ സായുധ സമരത്തിലേര്പ്പെട്ടിരുന്ന വിമത സൈന്യം ഈ ഇറാക്വ് സംഘവുമായി ലയിച്ച് അന്നുസ്റ ഫ്രണ്ട് എന്ന പേരില് സായുധ സമരം തുടര്ന്നു.
2011 ഡിസംബറില് അമേരിക്കന് സൈന്യം ഇറാക്വില്നിന്നും പൂര്ണമായും പിന്വാങ്ങിയതോടെ ബാഗ്ദാദിയുടെ കീഴില് ISI കൂടുതല് ശക്തിപ്രാപിക്കുകയും നൂരി അല് മാലിക്കിയുടെ നേതൃത്വത്തിലുള്ള ശിയാ ശവണ്മെന്റിന്റെ സുന്നീ വിരുദ്ധ നിലപാടുകള് ISIയ്ക്ക് സുന്നി ഭൂരിപക്ഷ പ്രദേശങ്ങളില് വന്സ്വാധീനം നേടിക്കൊടുക്കുകയും ചെയ്തു. തുടര്ന്ന് സിറിയയിലെ അന്നുസ്റ ഫ്രണ്ടിനെയും ISIനെയും ലയിപ്പിച്ച് Islamic State of Iraq and Syria എന്ന ഒരൊറ്റ സംഘടനയായി പ്രഖ്യാപിക്കുകയും അബൂബക്വര് അല് ബാഗ്ദാദി അതിന്റെ സ്വയം പ്രഖ്യാപിത ഖലീഫയാവുകയും ചെയ്തു.
(തുടരും)
Comments
Post a Comment